Гуруев Чингис Цыренович

Джарун Хашорой субарга -1

Υлгы Буряад орондом

Υлзы хотог заяаhан

Джарун Хашорой субарга

Жиндаг hүлды мандуулна.

   Адис, аршаан, далгатай

   Арюун байдал бүтээжэ,

   Арбан сагаан буянай

   Арьбан хэшэг дэлгээнэ.

Бурхан багшын hургаалтай

Буряад зоной сэдьхэлдэ

Мааниин зургаан үзэгэй

Мэргэн эрдэм хүртөөнэ.

    Хэбэд номхон Хэжэнгым

    Хэтын жаргал түхээгшэ

    Мүнхэ сагай шүтээн лэ

    Джарун Хашорой субарга!..

***

Джарун Хашорой субарга-2

 

Дүрбэн зүг,

Найман хизаарта

Хараагаа табиhан

Хутагта гэгээн нюдэн.

   Арюун номын нютагтаа

   Арсын үнэр хангалтуулан,

   Сэдьхэлэй заhал залаха,

   hүзэг бэшэрэлэй тахил.

Нигүүлэсхы жама еhо

Нарин нягтаар бүтээжэ,

Гарза, зоболон, бэрхэшээлые

Гаталан дабаха ухаан.

   Түрэ засагтаа түшэжэ,

   Түмэн олоной хилэнсые

   Зайсуулан бисалгаха убдистай

   Зам харгын үйлэ…

***

 

Дуун «Джарун Хашорой субарга»

Υгэнь Ч. Гуруевай 

Хүгжэмынь В. Пантаевай

Υлгы нютаг Буряадта

Υлзы хотог үршөөhэн

Джарун Хашорой субарга

Дура зүрхым буляана.

   Алтан дэлхэйн шарайда

   Арюун байдал бүтээжэ,

   Арбан сагаан буянай

   Арбан хэшэг дэлгээнэ.

Буддын номнол шүтөөнтэй

Буряад зоной заяанда

Баяр, найдал асаржа,

Боди сэдьхэл дэлгээнэ.

    Хүжэ ногоон юртэмсын

Хэтын жаргал түхөөгшэ

hайхан сагай этигэл –

Джарун Хашорой субарга!

***

Джарун Хашорой субаргын магтаал

Түхэреэн Хэжэнгэ нютагым

Түшэглэн, арюудхан заларhан

Джарун Хашорой субарга

Даяанша дүрээрээ оршомой.

     Аажамхан Хэжэнгэ нютагым

     Ашатын буянаар жаргуулhан

     Бэлигүүн шэдитэ субарга

     Бэшэрэл шүтөөнэй убдистай.

Буусахан Хэжэнгэ нютагым

Бурханай оронтой сасуулhан

Бадмахан сэсэгшүү субарга

Бадарал соёлой хэшэг юм.

…Арьяа – Баала,

Ум маани бадмай хум!

Арад зоной

Урма баяр дэлгэрээ!

***

Дуун «Джарун Хашорой субарга»

Υгэнь Д.Дагбаевай

Хүгжэмынь О. Баяртуевагай

Шамбалын орон гарбалтай

Шажан мүргэлэй субарга.

Сагаан сэдьхэлhээ мүргэлтэй

Сая түмэнэй бүтээл юм.

Дабталга:

Непал оронhоо мандалтай

Нангин шүтөөнэй субарга.

«Намо Буддаяа» юрөөлтэй

Намжаа Бургаасатайн бүтээл юм.

     Жагар оронhоо үршөөлтэй

     Джарун Хашорой субарга.

     Жаргал садагhаа жаматай

     Заяа хубиимнай бүтээл юм.

Дабталга

Бурхан Гашабhаа намтартай

Буян хэшэгэй субарга.

Буряад арадhаа эхитэй

Бүхы дэлхэймнай бүтээл юм.

Дабталга.

 

Еши – Содбо лама Цыван Фёдоров

Джарун – Хашорой субаргын  магтаал

Хэбэд номин Хэжэнгын талада мүндэлhэн,

Замбуу түбиин гайхамшагта нангин шүтөөн болоhон,

Бэе, хэлэн, сэдьхэл арюудхаhан ехэ субарга

Баатар ехэ Джарун – Хашорой субаргада мүргэмэй

Ленхово сэсэгээ дээрэ наран сараниие дэбисхэрлэн

Уулын оройhоо үүрэй наранай толорон гарахадань,

Υдэр hүниие илгангүй, hүр жабхалантайгаар үзэгдэнэ.

Эрдэнитэ дамжагай гурбан ехэ замай табсан

Хаан гаруудиин далидал дүрбэн зүг адислана

Бүрилдэhэн үлзы хотогой ехэ б[мбэ сэдьхэл шэлэhэн зэндэмэни.

Изагууртай хүбүүд, изагууртай басагад Буряад арад түмэн мүргэнэ.

Хамагые хаража сахигшын урин шарайhаа

Дүрбэн зүг найман хизагаарта адислан соерхо

Эхэ зургаан зүйл хамаг амитан

hолонгото  мэтэ хадагаар золгон мүргэнэ.

Шүтэн барилдалгын шэдитэ нангин шүхэр эрдэни

Хүхэ номин огторгойгоор хүбөөлэн намилзана, 

Орьел өөдэ нэрбыжэ ошоhон илагуугсанай тэмдэгээр

Арбан гурбан номой хүрдые эрьюулэн дэлгэрүүлжэ,

Амин голой агаарhаа эрдэнитэ зургаан үзэгэй аялга

Дууншуур маани зэдэлүүлэн,

Оршолоной далайhаа гэтэлүүлхэ.

Алтан найман хиигэстэй эрьелдэhэн хорлын дээрэ

Джарун – Хашорой субаргын хото мандал заларна.

Изагууртанай табан ехэ Бурхад заларжа адитидлэнэ

Зүүн зүгэй «Хум» үзэгөөр гэрэл сасаран хүхэ үнгэтэй

Мижодба бурхан заларна,

Урда зүгэй «Дро» үзэгөөр гэрэл сасаран шара үнгэтэй

Ринжин бурхан заларна.

Баруун зүгэй «hри» үзэгөөр гэрэл сасаран улаан үнгэтэ

Абида бурхан заларна.

Хойто зүгтэ «А» үзэгөөр гэрэл сасаран ногоон

Υнгэтэй Дондыб бурхан заларна.

Голдо «Ом» үзэгөөр гэрэл сасаран сагаан үнгэтэй

Намбад, Нанзад заларна.

Υйлөөр барилдаhан оршолоной далайhаа хахасуулан адислана.

Уржан нангин оронhоо хонхо дамаариин аялга зэдэлнэ

Хэтэ мүнхэдөө дуулдана, Бада – Самбаавын нангин сударай аялга.

Харанхы мунхагай ябадалые арюудхан адислана.

Бэе, хэлэн, сэдьхэлээрээ мүргэн hүзэглэнэ хүнүүд.

Эхэ зургаан зүйл амитад шэхээрээ дуулаад,

Ерэжэ нюдөөрөө хараха, нюдөөрөө хараад,

Сэдьхэл уярха, сэдьхэлээ уяраад, hүзэг түрүүлхэ.

hүзэгөө түрүүлээд, буян хуряаха, буян хуряагаад, үлзы хотог оршожо,

орон нютаг hайжарха, орон нютаг hайжараад, эхэ зургаан зүйл амитан амгалан жаргаланиие үзэхэ ботогой.

Сансарын далайн долгинууд эбхэрэн эрьежэ хушана,

Хүмүүнэй сэдьхэлые татажа, оршолон ошоно оеоргүй,

Тэнгэри хүмүүнэй түрэлые дамжан ябаhан үгэльгын эзэд ойлгыта:

Υнгэтэ юртэмсын байдалые тэбшэжэ,

Омог дорюун бодолоо орхижо, Бурхандаа этигэл ябуулыт,

Далай  ехэ олон Бурхадаа hанан байжа мүргэе,

Далай ехэ олон Бурхадтаа далай ехэ тахил үргэе,

Далай ехэ олон Бурханай бунда даган баясажа, адистань хүртэжэ,

Оршолоной далайhаа гэтэлэн ходоржо, саглашагүй гэрэлтын орондо эндэhээ үнгэрэмсөөрөө,

 Баруун зүгэй Жаргаланта Сухаваадиин орондо номой дуу дуулажа, хубилан түрэхэ болтогой!

***

Базарова Соёлма Мункуевна 1952 ондо Улзытэ нютагта түрэhэн.

Джарун хашорой субаргада магтаал

Намо Гуру –бээ,

Намо Будда-яа,

Намо Дарма-яа,

НамоСанга-яа.

    

 Эсэгэ дайдые юрөөhэн,

Эхэ тоонтын үршөөhэн

Абьяас габьяат санаартанай

Ашата буянай ушарал,

Асари габшагай ябадал.

Джарун Хашорой Субарга,

Буддын номнолой Субарга,

Бурхад суртаалай Субарга.

 

Алас хойто хизаартанай

Агуу хүсэеэ холбоhон,

Олдохоёо шухаг эрдэни

Онсохон шухала Субаргамнай.

Сэгнэшэгүй баялиг зэндэмэни

Сэбэрхэн эрмэлзэл зоригнай.

Джарун Хашорой Субарга

Буддын номнолой Субарга,

Бурхад суртаалай Субарга.

***

Бальжирова Елизавета Васильевна

Джарун Хашорой субарга

Ая гангаар анхилhан Хэжэнгэдэ

Арюун Бургаастайн аглаг үбэртэ

Арад олоной ашатын буянда

Алтан ганжар толотон гэрэлтэхээр

          Дахинаа шэнээр мүндэлхэнь

          Джарун Хашорой субарга.

Байгал шадарай Буряад орондо

Буддын шажанай дэлгэрхэ зүгтэ

Бүгэдэ hүзэгтэнэй шүтэн зальбарха

Балбын оронhоо бурханай абаралаар

       Дахинаа шэнээр мүндэлхэнь

          Джарун Хашорой субарга.

Хүнгэн бэшэ, хүшэр сагта

Хүлгэн бууhан hүрөөтэ жэлнүүдэй

Хохидол, гээгдэл гаталха замда

Холын бодол зондоо түгөөхөөр

       Дахинаа шэнээр мүндэлхэнь

          Джарун Хашорой субарга.

Мүргэл шажанай мандаха үедэ

Нангин hургаал, оюун бэлигые

Мүнөө сагай залуу үетэндэ

Мүнхэ зулаар бадаран гэрэлтэн,

        Дахинаа шэнээр  мүндэлхэнь

        Джарун Хашорой субарга. 1991 он.

***

 

 

 

 

 

 

 

Гунзынов Улзыто Дамбиевич

Джарун Хашорой субаргада магтаал

Балбын ороной бүмбэтэй

Джарун Хашорой субарга

Буряад hайхан орондо

Буддын шажаниие дэлгэрүүлнэ!

Нигүүлэсхы сэдьхэлэй дүлөөрөө

Нүгэлэй бузарhаа аршална.

     Хэбэд номхон Хэжэнгэдэ

     Джарун Хашорой субарга

     Холоhоо харагдан толоржо,

     Хүнүүдэй зүрхэ баясуулна!

     Буянта гэрэл сасараажа,

     Боди сэдьхэл түрүүлнэ.

Хаанашье холо ябахадамнай

Джарун Хашорой субарга

Хододоо зүрхэ сэдьхэлдэмнай

hанагдан маанадые уяруулна!

Урма зориг түрүүлжэ,

Ухаан бодолыемнай номгоруулна!

     Бурхан Багшын адистай

     Джарун Хашорой субарга

     Боди гэрэл бадараажа

     Буряад арадые хамгаална!

     Аюул үбшэнhөө зайлуужа,

     Амгалан байдал тогтооно!

Буряад hайхан орониин

Джарун Хашорой субарга

Бата бэхеэр халхалжа

Бүгэдэ  дайсадhаа абарна!

Эди шэдиингээ хүсөөрөө

Эб найрамдал тогтооно!

     Бэлигэй далай шэнгээhэн

     Джарун Хашорой субарга

     Бурхан Багшын шажанай

     Баялиг гүүлэжэ суурханхай!

     Дэлхэйн бүгэдэ hүзэгтэнэй

     Даяанай газар болонхой!

Түрэл hайхан Хэжэнгын

Джарун Хашорой субарга!

Түмэн зондоо туhалжа

Туяа татан яларна!

Боди сэдьхэл түрүүлжэ,

Буян хэшэг асарна!

2019 оной февралиин 24. Ханты – Мансиин округой Сургут хото.